BODABODA WAKABIDHI MADAWATI 16 KWA MKUU WA MKOA WA IRINGA

 Mapema leo bodaboda na Bajaji walikusanyika ofisini kwa mkuu wa mkoa wa Iringa Mhe.  AMINA MASENZA kukabidhi madawati kama msaada ambao umelenga kutatua tatizo la madawati katika baadhi ya shule Mkoani Iringa.

Madawati hayo kumi na sita(16) yenye thamani ya shilingi Laki tisa na elfu sitini (960,000) yamekabidhiwa kwa mkuu wa mkoa wa Iringa ofisini kwake huku akipewa jukumu la kuchagua shule yenye upungufu wa madawati ili kuweza kuyapeleka.

 Akikabidhi madawiti hayo mwenyekiti wa Bodaboda na Bajaji  Manispaa ya Iringa Joseph Mwambope amesema ni kawaida yao kama chama cha Bodaboda kutoa msaada pale ambapo wanaguswa,  kama vile waliweza kutoa unga wa sembe kwa wafungwa gerezani na sasa wameamua kutoa madawati hayo kwaajili ya kuwasaidia wanafunzi.

Sambamba na hilo mwenyekiti Mwambope amemuomba mkuu wa mkoa wa Iringa kuwatafutia eneo la kufanyia kazi Katikati ya mji ambapo kuna abiria wengi lakini hawana eneo kwaajili ya kupaki bajaji zao ili waweze kufanya biashara zao.

“Sisi kama Bodaboda na Bajaji hatuna ugomvi na Polisi wala SUMATRA ila kuna watu wasio na malengo mazuri dhidi yetu wamekuwa wakijaribu kuwagombanisha ili wao waonekane kuwa ni wabaya kwa polisi na SUMATRA”. Alisema Mwambope.

Akipokea Msaada huo wa madawati kutoka kwa vijana wa bodaboda Manispaa ya Iringa Mheshimiwa Amina Masenza amewashukuru kwa kupata msaada huo ambao umekuja kwa wakati muafaka na wakati ambapo yanahitajika.

 “Nashukuru kwa msaada wenu ila Madawati haya moja kwa moja nayapeleka Wilayani Kilolo ambapo kuna uhitaji mkubwa wa madawati kwani hapa manispaa Hakuna shida kubwa sana ya madawati”. Alisema Masenza.

Masenza amewaomba vijana hao chini ya mwenyekiti wao Mwambope kuweza kutii sheria na kanuni za barabarani ili kuepusha ajali kwani wengi wao wamekuwa wakaidi wa sheria hizo.

“Ninawaombeni muweze kujiunga na Mfuko wa bima ya afya pindi mtakapopata ajali muweze kujitibu wenyewe na kuondokana na gharama za matibabu”. Aliongeza Masenza.

Share on Google Plus

Ahsante kwa kutembelea site yangu, unaweza kunicheki kwenye mitandao ya kijamii kwa kubonyeza icons juu kulia na kunipata moja kwa moja kwenye Facebook, Twitter na Instagram...Endelea kuwa karibu yangu ili uweze kufikiwa na chochote kinachonifika.