Wahajiri 44 wafariki dunia kwa kiu kaskazini mwa Niger baada ya gari lao kuharibika

 

Shirika la Kimataifa la Msalaba Mwekundu limetangaza kuwa, wahajiri wapatao 44 ambao wengi wao ni kutoka nchi za magharibi mwa Afrika wamefariki dunia kwa kiu kaskazini mwa Niger baada ya lori walilokuwa wakisafiria kuharibika katikati ya jangwa.

Afisa wa Shirika la Msalaba Mwekundu katika mji wa Bilma nchini Niger amewaambia waandishi wa habari kwamba, wahajiri hao waliopoteza maisha wengi wao ni raia wa Ghana na Nigeria. Lawal Taher amesema kuwa, miongoni mwa wahajiri waliofariki dunia katika ajali hiyo wamo watoto wawili wadogo na kwamba, sita kati yao wamenusurika kifo. 

Taarifa zaidi zinasema kuwa, wahajiri sita walionusurika kifo walilazimika kutembea kilomita kadhaa hadi kufika katika kijiji kimoja na kuomba msaada wa maji na chakula.

 

Manusura hao ndio waliosimulia mkasa wa wenzao 44 waliofariki dunia jangwani wakati walipokuwa wakisafiri kwa lori moja kuelekea kaskazini mwa Afrika na kisha baadaye Ulaya kwa ajili ya kwenda kutafuta maisha.

Hata hivyo hadi sasa viongozi wa serikali ya Niger bado hawajathibitisha habari hiyo. Wimbi la wahajiri haramu wanaoelekea barani Ulaya kutafuta maisha bora limeongezeka mno katika miaka ya hivi karibuni. Pamoja na kwamba baadhi hufanikiwa kufika salama huko waendako, lakini hadi sasa idadi kubwa ya wahamiaji hao haramu wamepoteza maisha katika safari hizo za kuelekea barani Ulaya. 

Wahajiri hao haramu ambao kutokana na sababu za kiuchumi huamua kuziacha nchi zao kwa tamaa ya kwenda kutafuta kazi na maisha mazuri barani Ulaya, hutokea katika nchi za Nigeria, Eritrea, Somalia, Sudan, Gambia, Senegal, Mali, Morocco na Tunisia.

Share on Google Plus

Ahsante kwa kutembelea site yangu, unaweza kunicheki kwenye mitandao ya kijamii kwa kubonyeza icons juu kulia na kunipata moja kwa moja kwenye Facebook, Twitter na Instagram...Endelea kuwa karibu yangu ili uweze kufikiwa na chochote kinachonifika.